Екінші нарықтағы үйге ипотека алу: барлық банктің шарттары
![Екінші нарықтағы үйге ипотека алу: барлық банктің шарттары](https://cf-kr.kcdn.online/content/4d/801669a1e024a46f258_.png)
Екінші нарықтағы үй үшін ипотека шарттарын банктерден білдік: қандай пәтер сәйкес келеді және іздеу барысында уақыт жоғалтпау үшін қандай үйді қарастырудың қажеті жоқ.
Екінші нарықтағы үйге ипотеканы қандай банктер береді
Қазақстандағы банктердің көбі екінші нарықтағы үйді сатып алуға несие береді. Бірақ барлығы емес. Мысалы, Еуразиялық банк қазір тек мемлекеттік «7-20-25» бағдарламасы бойынша (бірінші нарық) жұмыс істейді немесе тек ипотека несиесін қайта қаржыландырады. Bereke банкі ипотекалық несиелеуді мүлде тоқтатты.
Ипотеканы төмендегі банктерден алуға болады:
— Altyn;
— Halyk;
— ЦентрКредит Банк;
— Фридом Банк Қазақстан;
— ForteBank;
— Нұрбанк;
— Отбасыі.
Қандай пәтерді ипотекаға сатып алуға болмайды
Банктердің көбі каркас-қамыстан жасалған үйдегі пәтерге несие бермейді.
Егер пәтерде қайта жоспарлау жұмысы жасалған болса, несие алу мүмкін емес. Кейбір банктер үй заңдастырылған болса да қабылдамайды.
Мансард және жертөле қабатындағы пәтер, тұрғын үй емес ғимарат және саяжай кепіл ретінде қабылданбайды.
Кейбір банк жатақханадан бөлме сатып алуға несие бермейді.
Екінші нарықтағы үйге арналған ипотека шарттары
Банктер бастапқы жарна (пәтер құнынан кемінде 20 %) талап етеді, Forte банкте — 15 %, Нұрбанкте — 30 %. ЦентрКредитте бастапқы жарнасыз ипотека рәсімдеуге болады, бірақ қосымша кепіл ретінде жылжымайтын мүлік қажет болады.
Қарапайым банктердегі максимал мерзім — 20 жыл.
Ең төменгі мөлшерлемені алдық. Мөлшерлеме көптеген факторға байланысты: қарыз алушының несие тарихы, ресми табыстың болуы, баспана құны және т.б. Несие шарттары несие рәсімдеу кезінде банкте жеке есептеледі.
Altyn Bank
1975 жылдан ескі емес пәтерге несие беріледі. Үй каркас-қамыстан жасалған болмауы керек. Мұндай үйдегі пәтер ипотекаға сәйкес келмейді. Жеке үй сатып алғанда, банк қожблок, ағаш, каркас-қамыстан жасалған және саман үйді қарастырмайды.
Банк баспана қаланың өзінде, 30 км қашықтықтан аспайтын қала маңында болса қарастырады.
Несие шарттары:
— мөлшерлеме — 19 %-дан бастап;
— мерзім — 20 жылға дейін;
— бастапқы жарна — 20 %-дан бастап.
Halyk Bank (Халық)
Банк 1960 жылдан кейін салынған, тек қала шегінде (қала маңы жарамайды) орналасқан үйге несие береді. Каркас-қамыс және саман үй, сондай-ақ жатақханадағы бөлме жарамайды.
Несие шарттары:
— мөлшерлеме — 17.5 %-дан бастап;
— мерзім — 20 жылға дейін;
— бастапқы жарна— 20 %-дан бастап.
ЦентрКредит Банкі
Салынғанына 60 жылдан аспаған кірпіш, монолит, панель және каркас-қамыстан жасалған үйдегі пәтерді рәсімдеуге болады, ағаш және газоблок үйдің салынғанына 55 жылдан аспауы керек. Жатақханадағы бөлмені, сондай-ақ қала маңындағы пәтер мен үйді ипотекаға алуға болады. Алматы облысында — қала шекарасынан радиусы 50 км жерде.
Несие шарттары:
— мөлшерлеме — 19.5 %-дан бастап;
— мерзім — 15 жылға дейін;
— бастапқы жарна — 20 %-дан бастап.
Фридом Банк Қазақстан
Бұл банктегі пәтерге қойылатын талаптар төмендегідей:
— үйдің салынған жылы — 1965 жылдан кейін;
— пәтер ауданы кемінде 29 шаршы метр.
Қайта жоспарланған пәтер заңдастырылған болса ипотека алуға болады. Каркас-қамыстан жасалған үйлердегі пәтер де сәйкес келеді.
Несие шарттары:
— мөлшерлеме — 17.2 %-дан бастап;
— мерзім — 20 жылға дейін;
— бастапқы жарна — 20 %-дан бастап.
ForteBank
Forte-де 1965 жылдан кейін салынған үйдегі пәтерге ипотека рәсімдеуге болады. Банк оңтүстік өңірдегі каркас-қамыс үйдегі пәтерді қарастырады, Алматы мен Астанада бұған кірмейді. Жатақханаға несие берілмейді. Қайта жоспарланған пәтерге несие алуға болады, бірақ несиенің пайыздық мөлшерлемесі өседі.
Несие шарттары:
— мөлшерлеме — 18 %-дан бастап;
— мерзім — 20 жылға дейін;
— бастапқы жарна — 15 %-дан бастап.
Нұрбанк
Бұл банк салынғанына 50 жылдан аспайтын, яғни 1974 жылдан кейін салынған екінші нарықтағы тұрғын үйге несие береді. Қалада және қала маңында, бірақ 10–15 км аспайтын қашықтықта орналасқан кірпіш, панель және монолит үйдегі пәтерге несие рәсімдейді. Жатақханаға бермейді. Қайта жоспарланғаны заңдастырылған пәтерді алуға болады.
Несие шарттары:
— мөлшерлеме — 19.5 %-дан бастап;
— мерзім — 20 жылға дейін;
— бастапқы жарна — 30 %-дан бастап.
Отбасы банк
Отбасы банк арқылы салынғанына 60 жылдан аспайтын (1964 ж.) екінші нарықтағы пәтерді сатып алу үшін несие алуға болады. Материалы — кірпіш, монолит, бетон блоктары. Панель үй болса, салынғанына 50 жылдан (1974 ж. салынған) аспауы керек. Каркас-қамыс үйдегі пәтер рәсімделмейді. Жатақханадағы бөлмеге немесе қала маңындағы баспанаға ипотека алуға болады.
Пәтер қайта жоспарланған болса, тек заңдастырылған жағдайда несие беріледі.
Банктің өзіндік несие жүйесі бар. Келіп, бірден ипотека рәсімдеуге келмейді. Депозит ашып, оған баспананың 50 %-ын салу қажет. Соманы бірден аударуға болады, бірақ ақша шотта 6 ай жатуы тиіс.
Несиенің екі түрі бар: аралық және тұрғын үй несиесі.
Аралық
- Мөлшерлеме — 6-10 %.
Депозитте тұрғын үй құнының 50 %-ы жиналса және ақша банкте кемінде 3 ай жатса беріледі.
Үш жылдан кейін аралық несие тұрғын үй несиесіне ауысады.
Тұрғын үй
- Мөлшерлеме —3.5-5 %.
Аралық несие рәсімдемеуге болады, бірақ депозиттің ашылғанына кемінде 3 жыл болуы керек.