Krisha.kz кім және қандай жағдайда төлемнен босатылатынын анықтады.

Нотариус қызметін төлеу екіге бөлінеді:
— мемлекеттік баж;
— құқықтық және техникалық қызметтер (тек жеке мамандар төлейді).

Кім толық босатылады

— Ұлы Отан соғысының ардагерлері;
— жеңілдіктер бойынша Ұлы Отан соғысының ардагерлеріне теңестірілген және басқа мемлекеттердің аумағындағы ұрыс қимылдарының ардагерлері;
— Ұлы Отан соғысы жылдарында тылдағы қажырлы еңбегі мен мінсіз әскери қызметі үшін бұрынғы КСР Одағының ордендерімен және медальдарымен марапатталған адамдар;
— 1941 жылғы 22 маусымнан 1945 жылғы 9 мамырға дейін кемінде алты ай жұмыс істеп (қызмет еткен), ҰОС жылдарында тылдағы қайсар еңбегі және мінсіз әскери қызметі үшін КСРО-ның орденімен және медалімен марапатталмаған адамдар;
— мүгедектер, сондай-ақ бала кезінен мүгедек немесе мүгедек баланың ата-анасының бірі;
— «Батыр ана» атағын алған, «Алтын алқа», «Күміс алқа» алқаларымен марапатталған көп балалы аналар.

Ішiнара босатылады — қорғаншылық тағайындалған cозылмалы жүйке ауруымен ауыратын жеке тұлғалар — өздерiнiң мүлiкке мұрагерлiгi туралы куәлiктер алған адамдар.

Мемлекеттік баж алымынан кім босатылады

  • жеке тұлға — өсиеттерді, мемлекет пайдасына сыйға тарту шарттарын куәландырғанда;
  • жетім балалар мен 18 жасқа толғанға дейін ата-анасының қамқорлығынсыз қалған балалар — оларға мұраға алу құқығы туралы куәлік беру үшін;
  • қандастар — Қазақстан Республикасының азаматтығын алуға байланысты барлық нотариалды әрекеттер үшін;
  • «Қазақстан мүгедектерінің ерікті қоғамы» одағы, Қазақ саңыраулар қоғамы, Қазақ соқырлар қоғамы, сондай-ақ олардың өндіріс кәсіпорындары — барлық нотариалды әрекет үшін;
  • мемлекеттік мекемелер — мемлекеттің мұрагерлік құқығы туралы куәлік (телнұсқаларды), сондай-ақ куәлік алуға қажет құжаттарды беру үшін;
  • жеке тұлға мұраға құқық туралы куәлік алу үшін, мыналарға қатысы бар болса: 
    — Қазақстан Республикасын қорғау кезiнде, өзге де мемлекеттiк немесе қоғамдық мiндеттердi орындауға байланысты не Қазақстан Республикасы азаматының адам өмiрiн құтқару, мемлекеттiк мүлiктi және құқықты қорғау мiндеттерiн орындауға байланысты қаза тапқан адамдарға; 
    — мұрагер мұра қалдырушы қайтыс болған күні онымен кемінде үш жыл бірге тұрса және ол қайтыс болғаннан кейін осы тұрғын үйде тұруын жалғастырса, тұрғын үй немесе тұрғын үй-құрылыс кооперативіндегі үлеске; 
    — сақтандыру шарты бойынша, мемлекеттік қарыз облигациялары, еңбекақы, авторлық құқық, авторлық қаламақы, жаңалық ашу, ойлап табу және өнеркәсіптік үлгілер үшін сыйақы бойынша сақтандыру төлемдеріне; 
    — ақталған азаматтардың меншігіне.

Құқықтық және техникалық қызметтерді төлеуден кім босатылады

— нотариалды куәландыруға жататын құжат жобасын өз бетінше дайындаған жеке және заңды тұлға;
— жалпы қарттар мен мүгедектерге арналған медициналық-әлеуметтік мекемелерде тұратын қарттар мен мүгедектер;
— ата-анасының қамқорлығынсыз қалған және жетім балалар;
— I және II топ мүгедектер;
— жасы бойынша зейнеткерлер;
— есептелген, бірақ төленбеген еңбекақыны және басқа төлемдерді талап ету бойынша өндіріп алушылар.