ПИК (КСК), МИБ (ОСИ) көп пәтерлі үйді жылу маусымына қалай дайындайтынын және қандай жағдайда пәтердегі батарея салқын болатынын түсіндіреміз.

Үйді қысқа кім дайындауға тиіс

Бұл тұрғындар мен кооператив не бірлестік басшыларының міндеті. Олар өз бетінше жұмыс істейді, не болмаса сервистік компанияларды шақырады. Мұндай жағдайда қызмет ақысын тұрғындар төлейді. Коммуналдық қызмет түбіртегінде «Жылыту жүйесіне, элеватор торабына техникалық қызмет көрсету» деген жол болады. Ай сайынғы төлем сомасы пәтердің ауданына байланысты, әдетте шаршы метріне 10 теңге шамасында сұралады.

Тұрғындар басқарушылардан жылу жүйелеріне, элеватор тораптарына және жылу орындарына білікті мамандар қызмет көрсетуін талап етуге құқылы.

Үйді жылу маусымына қалай дайындайды

Мамырда басқарушылар жылу жеткізушілерден үйді жылу маусымына дайындау туралы ұйғарым алады. Бұл жиырмадан аса тармақтан тұратын кешенді жұмыс.

Негізгі кезеңдер:

  • Шаю — жылу маусымы аяқталған соң құбыр ішінде қалған қалдықтарды, кірді кетіру. Оны екі жылда бір рет істеуге болады.
  • Қысым көмегімен тексеру — жылу жүйесінде саңылау бар-жоғын және жылу тасығыштың қысымына шыдас беру қабілетін анықтайтын гидравликалық сынақтар.
  • Есептегіш дроссель құрылғы орнату — жылу тасығыш бүкіл тұрғынға бірдей жету үшін тұрақты гидравликалық режим құру.

Үй қысқа дайын екенін тұрғындар қалай біледі

Дайындық аяқталған соң үйдің жылу кезеңіне әзірлігін растайтын акт беріледі. Құжатты алу үшін басқарушылар қаладағы жылу желісінің аудандық бөліміне жүгінеді.

Дәл осы құжатты пәтер иелері жауапты кооперативтен не бірлестіктен талап етсе болады.

Егер акт болмаса, ғимаратқа жылу берілмейді.

Пәтердің жылымау себептері

Үй аязды күндерге сақадай сай тұрғанмен, пәтердегі радиатор мынадай себептерге байланысты еш жылымауы мүмкін:

  • Үй ішіндегі жылу жүйесінің тозуы.
  • Жылу жүйесінде ауа болуы.
  • Тікқұбырдың не радиатордың бітелуі.
  • Элеватор торабының бітелуі.
  • Шаю, қысым көмегімен тексеру жұмыстарының сапасыз атқарылуы.
  • Айналымның бұзылуы.
  • Пәтер ішіндегі жылу жүйесін өзгерту, сәйкес келмейтін құбыр орнату.
  • Жылу жоғалту: кіреберістегі әйнегі жоқ терезе, жылымайтын жертөле, шатыр асты.
  • Сыртқы/ішкі жылу желілерінің зақымдалуы.

Анықталған ақауды көршілермен келісіп не басқарушылар арқылы жою керек.

Астана мен елдің алты облысында жылу маусымы басталып кетті. Басқа өңірлердегі әлеуметтік нысандар мен тұрғын үйлерге 3-25 қазан аралығында жылу беріледі. Алматыдағы ғимараттар жылу жүйесіне 15 қазаннан бастап қосылады.