Екінші нарықтан ипотекаға бір бөлмелі пәтер алсаңыз, қанша төлеуге тура келеді? Ай сайынғы сома мен артық төлемді білу үшін тоғыз банкке хабарластық

Қазақстанда қандай ипотекалар бар

Қазір банктер ипотеканың бірнеше түрін ұсынады.

  • Стандарт. Банк пәтер алу үшін ақша береді, ал жылжымайтын мүлік кепілзатқа айналады. Пайыз тек қарыз сомасына үстеледі.
  • Ақшалай кепілдік. Қарыз алушы депозитке қаражат салады да, оны банкке аударады. Мұндай қарыздың пайызы төмен, бірақ ол бүкіл кредит сомасына қосылады.
  • Жинақтық. Алдымен депозит ашып, ақша жинау керек. Неғұрлым көп жинасаңыз, бағалау көрсеткіші соғұрлым артып, мөлшерлеме кеми береді. Отбасы банк пен кейбір қаржы ұйымы осы жүйе бойынша жұмыс істейді.

Банктердің көбінде минимал бастапқы жарна — 20%. ForteBank 15% сұрайды. Отбасы банк арқылы баспаналы болу үшін үй құнының 50%-ына тең ақша жинау қажет.

Банктердегі актуал шарттар — мөлшерлеме, бастапқы жарна, несие мерзімі және пәтер мен үйге қатысты талаптар Қазақстандағы ипотека — барлық банктің шарттары мақаласында жазылған.

Бір бөлмелі пәтер үшін қанша төлеу керек

Банктерден ең аз бастапқы жарнамен 30 млн теңге тұратын пәтерді 10 жылға рәсімдесе қандай сома шығатынын есептеп беруді сұрадық.

Банк

Мөлшерлеме

БЖ

Төлем*

Артық төлем

Altyn Bank

21–22.3%

20%

480–501 мың

33.6–36.1 млн

Halyk Bank

19.5–24%

20%

456–529 мың

30.7–39.5 млн

Нұрбанк

20–22.2%

20%

464–499 мың

31.7–35.9 млн

ForteBank

21.5%

15%

518 мың

36.7 млн

Банк ЦентрКредит

19.5–22.15%

20%

456–499 мың

30.7–35.8 млн

Freedom Bank

22–24%

20%

496–529 мың

35.5–39.5 млн

Bereke Bank

21.7%

20%

491 мың

34.9 млн

Bank RBK

22–22.4%

20%

496–503 мың

35.5–36.3 млн

Отбасы банк
Арал.-тұрғын үй

8.5%, кейін 4%

50%

212 500 тг → 205 000 тг

9.9 млн тг*

Отбасы
Тұрғын үй

4%

50%

303 мың

6.3 млн

*Есеп комиссия, сақтандыру және басқа шығындарды ескерусіз, жобалап жасалды.

20% бастапқы жарна сұралатын стандарт ипотека бойынша азамат банктен 24 млн теңге алады, бастапқы жарна — 6 млн. Қаржы ұйымдарының көбінде ай сайынғы төлем 456-529 мың шамасында. 10 жылда 31 млн-нан 40 млн теңгеге дейін артық төлейсіз.

ForteBank-те бастапқы жарна сәл аз — 15%. Сондықтан қарыз алушы өз қалтасынан 4.5 млн теңге шығарады, ал банк 25.5 миллионды санап береді. Мөлшерлеме 21.5% болса, ай сайын 518 мыңнан жұмсайсыз, ал артық төлем 10 жылда 36.7 млн теңгені құрайды.

Отбасы банктен ипотека алу үшін алдымен 15 млн құю керек. Аралық қарыз мөлшерлемесі 8.5% болса, ай сайын 202 мың, тұрғын үй қарызына өткен соң 205 мыңнан беріп отырасыз. 10 жылда шамамен 10 млн теңге артық төлейсіз. Аралық қарыз кезеңінде пайыз бүкіл қарыз сомасына үстеледі.

Бірден 4%-бен тұрғын үй қарызын алсаңыз, ай сайын 303 мың теңге жұмсайсыз, есесіне банк бюджетіне небәрі 6.3 млн теңге кетеді.

Ипотека алу үшін қанша ақша қажет

Ипотека арқылы пәтер алған адам тағы біраз шығындалады.

Пәтерді бағалау. Ауданы 50 шаршы метрден аспайтын пәтерді бағалау құны орта есеппен 40 мың теңгеге тең.
Мәміле рәсімдеу. Сатып алу-сату шартының жеңілдікті тарифі — 4 АЕК (17 300 теңге). Кепілдік шартын куәландыру да 4 АЕК тұрады. Меншік құқығын тіркеу — әдетте 1304, асығыс болсаңыз — 5000 теңге.
Сақтандыру. Кепілде тұрған пәтерді сақтандыру керек. Полис көп жағдайда мүлік құнының 0.3—1%-ы шамасында. 30 млн тұратын пәтерге 200 мыңдай кетеді.

Түйгеніміз, бастапқы жарнадан бөлек, қолда тағы 280–300 мың болғаны дұрыс, ол мәміле жасап, объектіні бағалағанда қажетке жарайды. Риэлтор қызметіне жүгінсеңіз, шығын арта түседі.