Қазір кондиционер орнату бұрынғыдай оңай емес. Барлығы үйдің түріне, кей жағдайда қаланың талаптарына байланысты. Мысалы, Алматыда ғимараттардың сыртқы келбетіне қатысты қатаң дизайн-код талаптары бар.

Қандай жағдайда кондиционер орнату үшін келісу қажет екенін және қандай мәселенің алдын алуға болатынын түсіндіреміз. Бұл жөнінде түсініктемені Алматы әкімдігінен алдық.

Жаңа тұрғын үй кешенінде тұрсаңыз не істеу керек

Жаңа тұрғын үй кешенін салғанда құрылыс компаниясы кондиционердің орнын жобаны әзірлеп жатқанда дайындайды.

Олар:

  • арнайы себет,
  • орын,
  • сәнді қорап болуы мүмкін.

Жобада арнайы орын болса, кондиционердің сыртқы блогын сол жерге орнату қажет.

Кейде тұрғындар қуыс қатты қызып кеткенде кондиционер дұрыс жұмыс істемейді деп шағымданады. Бірақ сыртқы блокты өз бетінше басқа жерге қоюға болмайды.

Алдымен басқарушы компанияға жүгініңіз. Мәселе расталса, оны пәтер иелерінің жиналысында қарастыруы мүмкін. Өзгеріс ғимараттың қасбетіне әсер ететін болса, сәулет бөлімімен келісу қажет.

Ескі үйде тұрсаңыз не істеу керек

Ескі тұрғын үйде немесе «хрущёвкада» тұрсаңыз кондиционер орнату үшін арнайы рұқсат қажет емес.

Дегенмен үйдің қасбеті — меншік иелерге ортақ мүлік. Кондиционер қасбеттің сырт келбетін өзгертетін болса, алдымен МИБ-пен, ПИК-пен немесе басқарушы компаниямен келісіп алған дұрыс. Бұл кейін туындауы мүмкін шағымдардың алдын алады.

Кондиционер үшін айыппұл арқалау мүмкін бе

Кондиционердің өзі айыппұл салуға негіз болмайды. Қазақстанда кондиционерді рұқсатсыз орнатқаны үшін арнайы әкімшілік жауапкершілік жоқ.

Орнату барысында мәселе туындауы мүмкін:

  • ғимараттың қасбеті бүлінсе;
  • ортақ мүлікті пайдалану ережесі бұзылса;
  • құрылыс немесе сәулет нормасы сақталмаса;
  • кондиционер қатты шу шығарып, көршілерге кедергі келтірсе.

Мұндай жағдайда меншік иесі заң бұзушылықты жоюға тиіс. Кей жағдайда сыртқы блокты басқа жерге көшіруге немесе толық алып тастауға тура келеді.

Кондиционерді еш қиындықсыз қалай орнатуға болады

Бірнеше қарапайым кеңес:

  • жаңа тұрғын үй кешенінде тұрсаңыз, алдымен басқарушы компаниядан кондиционерге арналған орын бар ма, нақтылаңыз;
  • екінші нарықтан пәтер сатып алсаңыз, МИБ-пен немесе ПИК-пен алдын ала келісіңіз;
  • сыртқы блокты ғимараттың негізгі қасбетіне орнатпаңыз;
  • сәнд себет қолданып, құбыр мен кабельді көзге түспейтіндей етіп жасырыңыз;
  • көршілерді алдын ала хабардар етіп, құрылыс қалдықтарын жинаңых.

Мұның бәрі көп уақыт алмайды, бірақ көршілердің шағымынан, жанжалдан және кондиционерді басқа жерге көшіру туралы талаптардан сақтайды.

Неліктен Алматыда талаптар қатаңырақ

Алматыда 2024 жылдан бастап дизайн-код қолданылады. Ол ғимараттардың қасбеті қандай болуы, соның ішінде кондиционердің сыртқы блогын қай жерде тұруы керегін белгілейді. 

Астанада да дизайн-код бар және кондиционер орнатуға қойылатын талаптар дәл осындай.

Басқа қалаларда бәрі жергілікті ережеге байланысты. Қалада дизайн-код болмаса, арнайы талаптар болмауы мүмкін. Дегенмен құрылыс және тұрғын үй саласындағы жалпы нормаларды сақтау міндетті.

Krisha.kz материалынан дәйексөз келтіру үшін редакциядан рұқсат алу қажет. Krisha.kz материалын пайдаланғанда бірінші абзацта міндетті түрде сілтеме болуы керек!

Пайдалы материалдар:
Кіреберіске камера орнатуға бола ма
Қазақстанда табысты растамай ипотека алуға бола ма