Жалға берілетін, қызметтік тұрғын үйді немесе мемлекеттік қордан алынған пәтерді қалай жекешелендіруге болады? Заңнамадағы өзгерістерді түсіндіріп, тегін жекешелендіруге кімнің құқығы бар екенін анықтаймыз. Ең бастысы — толық нұсқаулық әзірледік. Пайдаланыңыз!

Пәтерді кім жекешелендіре алады

Қазақстанда баспананы жекешелендіру ережесі өзгерді. «Мемлекеттік тұрғын үй қорынан берілген тұрғын үйді жекешелендіру қағидаларына өзгеріс енгізу туралы» қаулы заңды күшіне енді.

Кімдерге жекешелендіруге рұқсат етілген:

  • Сатып алу құқығынсыз жалға алынған тұрғын үйде тұратын кезекте тұрған азаматтар.
  • Сатып алу құқығымен үй алған кезекте тұрған азаматтар. Пәтерді жалға алу мерзімінің аяқталғанын күтпей-ақ жекешелендіруге болады.
  • Еңбек өтілі 10 жылдан асқан мемлекеттік қызметкер мен сот.
  • 2013 жылғы 1 қаңтарға дейін қызмет ету мерзімі 10 жыл немесе одан көп болған әскери қызметкерлер.
  • Жалғыз баспанасы апатты деп танылған азаматтар. Пәтер апатты деп танылып, иесіне тұрғын үй қорынан уақытша баспана жалға берілген болса, оны жекешелендіруге рұқсат етіледі. Апатты баспана коммуналдық меншікке өтеді.

«Нұрлы жер» мемлекеттік бағдарламасы аясында соңғы бірнеше жылда 51 мың кезекте тұрған азамат сатып алу құқығынсыз жалдамалы пәтер алған. Енді олар баспанасын жекешелендіре алады.

Мемлекеттік тұрғын үйді жекешелендіру қанша тұрады

Пәтерді тегін жекешелендіре алатын азаматтар:

  • ҰОС ардагерлері;
  • мүгедек азамат немесе мүмкіндігі шектеулі бала тәрбиелеп отырған отбасылар;
  • көпбалалы отбасылар;
  • қызмет өтілі 20 жылдан асқан әскери қызметкерлер.

Қалғандарында тегін жекешелендіру құқығы болмаса, мемлекеттік тұрғын үйді жекеменшікке алу үшін оны қалдық құны бойынша сатып алу қажет. Оны бөліп төлеуге болады.

Қалдық құн — келісімшарт бойынша пәтердің бастапқы бағасы, одан жыл сайын физикалық тозу мөлшері (жылына шамамен 2 %) алынып отырады.

Пәтерді бөліп төлеу арқылы жекешелендіру

Жаңа ережеге сәйкес, енді қалдық құнның 10 %-ын (бұрын 30%) төлеп, ал қалған соманы 10–15 жыл ішінде тең бөлікпен төлеуге болады. Бұған дейін ең жоғары мерзім 10 жыл болатын.

Қалдық құны 15 млн теңгеден жоғары болса, 15 жыл бөліп төлеуге болады. Құны 15 млн теңгеден төмен болса, мерзімі 10 жылға дейін қысқарады. Бұл жағдайда пайыз бен артық төлем жоқ.

Қандай құжаттар қажет

Ең алдымен, жарамды ЭЦҚ (электрондық цифрлық қолтаңба) және компьютер керек, өйткені жекешелендіру өтінімі онлайн беріледі. Компьютер болмаса, кез келген ХҚКО-дағы жалпы залда орналасқан техниканы тегін пайдалануға болады.

Жарамды ЭЦҚ өтінім берушіде ғана емес, оның жұбайы мен кәмелетке толған балаларында (бар болған жағдайда) да болуы қажет. Себебі өтінім беруші және оның отбасы мүшелері қол қоюға тиіс.

Өтінім беру үшін қажет құжаттар мен анықтамалар:

  1. Өтінім берушінің және оның отбасы мүшелерінің (жұбайы мен балаларының) жеке куәлігі.
  2. Неке қию/бұзу туралы куәлік.
  3. Барлық баланың туу туралы куәлігі.
  4. Жалға алу келісімшарты немесе ордер.
  5. Өтінім берушінің немесе оның отбасы мүшелерінің әлеуметтік осал топтарға жататынын растайтын құжат (мүгедектік туралы анықтама, көпбалалы отбасы куәлігі және т. б.).
  6. Жұмыс орнынан анықтама. Тек мемлекеттік, бюджеттік ұйым және әскери қызметкерлерге қажет.
  7. Жалға алу келісімшарты бойынша қарызы жоқ екенін растайтын анықтама (тұрғын үй басқармасындағы тұрғын үй комиссиясы береді).
  8. Қазақстан аумағында жылжымайтын мүліктің жоқтығы туралы анықтама (барлық отбасы мүшесіне қажет).

Өтінім жіберер алдында аталған құжаттар мен анықтамалардың сканерленген көшірмелерін дайындаңыз (фотосуреттер жарамайды). Құжаттар PDF форматында болуы керек. Оларды компьютерге немесе флешкаға алдын ала сақтаңыз.

Пәтерді жекешелендіру: нұсқаулық

1. eGov. kz порталына кіріп, ЭЦҚ (электрондық цифрлық қолтаңба) немесе eGov Mobile қосымшасы арқылы QR-кодты сканерлеп, авторланыңыз.

Басты беттегі мына қадамдарды орындаңыз: «Азаматтарға» — «Жылжымайтын мүлік» — «Тұрғын үй қатынастары» — «Мемлекеттік тұрғын үй қорынан берілетін тұрғын үйлерді жекешелендіру» бөліміне өтіңіз.

2. «Онлайн сұрау» батырмасын басыңыз.

Осыдан кейін автоматты түрде e-qazyna. kz сайтына өтесіз.

3. Басты беттің төменгі жағына өтіп, Shanyraq есептік сервисін таңдаңыз. Жеке кабинетке кіріңіз (ЭЦҚ немесе eGov Mobile арқылы QR-кодпен). «Пайдаланушы келісімшартын қабылдаймын» деген жерге белгі қойып, «Кіру» батырмасын басыңыз.

4. «Тұрғын үй қорынан берілетін үйлерді жекешелендіру» терезесін басыңыз.

Өтінімді мұқият толтырыңыз, өзіңіздің жеке деректеріңізді енгізіңіз: аты-жөніңіз, ЖСН, әлеуметтік осал топқа жататын болсаңыз, категориясын көрсетіңіз. Одан кейін келесі жолақты толтырыңыз:

  • Кімнің атынан өтінім беру керек: «Өзімнің» дегенді таңдаңыз (қамқоршы да өтінім бере алады).
  • Келісімшартты тексеру: ЖСН енгізіп, мемлекеттік деректер базасынан жалға алу келісімшартын іздеңіз. Сіздің жалдамалы пәтеріңіз туралы мәлімет шығады, соған басыңыз.
  • Ұйым таңдау: тізімнен қалаңыз немесе ауданыңыз бойынша тұрғын үй берумен айналысатын мемлекеттік органды таңдаңыз.
  • Категория таңдау: әлеуметтік статусыңызды таңдаңыз (мүгедектік, ҰОС ардагері, көпбалалы отбасы және т. б.).
  • Қосымша категория таңдау: мысалы, I топ мүгедектігі бар азамат ретінде өз статусыңызды көрсетіңіз.
  • Отбасы мүшелері: сізбен бірге тұратын отбасы мүшелері болса, «Иә» дегенді таңдаңыз, болмаса «Жоқ» деп белгілеңіз.

«Иә» деп жауап берсеңіз, «Қосу» батырмасын басып, олардың ЖСН-ін және туыстық дәрежесін көрсетіңіз.

  • Құжаттар: осы формаға барлық қажет құжат пен анықтаманы тіркеңіз (формада көрсетілген тізім бойынша, неке куәлігі, балалардың туу туралы куәлігі, жылжымайтын мүліктің жоқтығы туралы анықтама және т. б.).
  • Қол: Барлық деректі мұқият тексеріп, өтінімге ЭЦҚ арқылы қол қойыңыз.

Өтінім берілді.

Видео-нұсқаулық

Өтінім берілгеннен кейін тұрғын үй комиссиясының жекешелендіру туралы шешімі өтінім жіберілген күннен бастап 30 жұмыс күні ішінде шығады.

Мына жағдайда жекешелендіру қабылданбауы мүмкін:

  • барлық қажет құжат пен анықтама толық берілмесе;
  • енгізілген деректер дұрыс болмаса;
  • өтінім берушінің немесе оның отбасы мүшелерінің меншігінде жылжымайтын мүлік болса (тіпті пәтер, үй немесе жер теліміндегі үлес те есепке алынады).

Өтінім қабылданса, жеке кабинетке хабарлама келеді, онда жекешелендіру келісімшартын рәсімдейтін мемлекеттік органның атауы көрсетіледі (әдетте бұл тұрғын үй басқармасы).

Келісімшартқа қол қойғаннан кейін оны eGov. kz порталы арқылы (ЭЦҚ-мен) немесе ХҚКО-да тіркеу қажет. Мемлекеттік тіркеу үшін төлем — 1448 теңге.
Келісімшарт тіркелгеннен кейін жалға алушы пәтердің ресми меншік иесі атанады.

Krisha.kz материалын пайдаланғанда бірінші абзацта міндетті түрде сілтеме болуы керек!