Пәтеріңізді жалға берер кезде не істеу керегін айтып береміз.

1. Заңды түрде жалға беріңіз.

Алдымен жалға беру заңды екеніне көз жеткізу қажет.
Біріншіден, тексеруден және айыппұлдан қорықпайсыз, себебі барлығы заңды.
Екіншіден, заңды бизнестің қосымша артықшылықтары бар:
— міндетті әлеуметтік медициналық сақтандыру (ОСМС) төлеп, тегін медициналық қызмет ала аласыз;
— зейнетақы жарнасын аударғанда, бірыңғай жинақтаушы зейнетақы қорындағы сома өседі;
— деректер ресми табыс ретінде көрсетіледі, бұл несие және ипотека рәсімдеуге мүмкіндік береді.

Пәтерді қалай заңды түрде жалға беруге болады?

Екі жолы бар: ЖК (жеке кәсіпкер) ретінде тіркелу немесе тіркелмеу.

ЖК ретінде тіркелмеу
Тіркелмесеңіз табыстан (жалға беру сомасынан) 10 % төлеуіңіз керек.
Мысалы, пәтерді 200 мың теңгеге жалға берсеңіз, жылына 240 мың теңге (12 айда жиналған 2.4 млн теңгенің 10 %-ы) төлейсіз.
Бұл салық қана, бұған әлеуметтік төлемдер кірмейді. Барлық сома мемлекет қазынасына түседі.

ЖК ретінде тіркелмей, тек 1 АЕК төленетін БЖТ (бірыңғай жиынтық төлем) биыл 1 қаңтардан бастап жарамсыз.

ЖК ретінде тіркелу
Алдымен ЖК ретінде тіркеліңіз.

Кейін салық режимдерінің бірін таңдау керек:

  • жеңілдетілген декларация;
  • патент;
  • E-Salyk Business.

Салық мөлшері табыстың 1-3 %-ын құрайды.

Жеке кәсіпкер салықтан бөлек, әлеуметтік аударым жасауы керек. Бұл табыс сомасына емес, ең төменгі жалақыға (2024 жылы 85 000 теңге) байланысты төленеді.
Ай сайынғы әлеуметтік төлем сомасы — 17 425 теңге.
Оған мыналар кіреді:
— міндетті зейнетақы жарнасы — 8 500 теңге;
— әлеуметтік аударым — 2 975 теңге;
— міндетті әлеуметтік медициналық сақтандыру жарнасы — 5 950 теңге.

2. Жалға алу келісімшартын жасаңыз.

Пәтерді келісімшартсыз жалға бермеңіз, ол құқығыңыз бен мүлкіңізді қорғайды.
Келісімшарт нотариуспен расталмай, жазбаша түрде жасалса да заңды күші болады.
Еш қиындығы жоқ:

1. Келісімшарт үлгісін жүктеп алыңыз.

Krisha.kz бұл үлгіні заңгерлермен бірлесіп әзірледі, оған өзгеріс енгізе аласыз.

2. Жалға беру шарттарын көрсетіңіз:
— мерзім;
— жалға беру сомасы, төлем күні, депозиттің бар-жоғы;
— пәтерді тексеру жиілігі;
— жалдап тұру шарттары және т.б.

Келісімшартта пәтерде шылым шегуге болмайтынын көрсетуге болады. Шылым иісі сіңген, төбесі сарғайған, еденде күйік ізі қалған пәтерді кейін басқа жалға алушыға беру әлдеқайда қиын.

Немесе жалға алушы тұрмыстық техниканы сындырса, оны жөндеуге немесе жаңасын сатып алуға міндеттелетінін қоса аласыз.

3. Қабылдау-өткізу актісін жасаңы.

Бұл құжат — жиһаз немесе тұрмыстық техника бүлінген немесе жоғалған жағдайда көмектесетін құрал.

Көшіп келмей тұрып мүліктердің тізімін жасаңыз. Барлық тұрмыстық техниканы, жиһазды, ыдыс-аяқ пен интерьер заттарын және т.б көрсетіңіз. Актіге суреттер қоса аласыз.

Нотариуспен растау міндетті емес, жалға алушы мен меншік иесінің қолы жеткілікті.
Мұндай акт жалға алушы бір нәрсені бүлдіріп, онымен келіспеген жағдайда көмектеседі.

4. Жалға беру құнын анықтаңыз.

Пәтерді жалға жылдам беру үшін және бағасынан қателеспей, яғни арзанға бермеу үшін және хабарландыруды жарияламас бұрын пәтеріңіздің нарықтағы нақты жалға беру құнын анықтаңыз.

Мұны Krisha.kz мобильді қосымшасы арқылы оңай және тегін білуге болады.

Мобильді қосымшаға кіріңіз.

  • «Мүлікті бағалау» опциясын таңдаңыз.
  • «Пәтерді бағалау» бетінде «Ай сайын жалдау үшін» дегенді басыңыз.
  • Пәтер параметрлерін көрсетіңіз:

— қала;
— тұрғын үй кешені;
— бөлме саны;
— көше, үй нөмірі, пәтер ауданы;
— жөндеу жұмыстары мен жиһаздың бар-жоғы.

  • «Пәтерді бағалау» батырмасын басыңыз.

Барлық параметрді ескере отырып, жасанды интеллект жалға беру ақысын есептеп береді.

Krisha.kz материалдарын қолданғанда алғашқы абзацта міндетті түрде сілтеме болуы керек!