Қазақстанда тұрғын үй кезегіне тұру және тұрғын үй үлестіру тәртібі жаңарды. 14 қыркүйектен бастап бес маңызды өзгеріс күшіне енді.
Енді тұрғын үй үлестіргенде отбасы құрамы мен бөлме саны ескеріледі. Ал тұрғын үй кезегіне жаңадан тұрғандарға қосымша шектеу пайда болды.

Не өзгергенін түсіндіреміз.

1. Отбасы құрамына туыстар кіреді

Бұрын: ерлі-зайыптылар мен олардың балалары есепке алынатын.

Не өзгерді: өзара келісім бойынша отбасы құрамына ерлі-зайыптылардың ата-анасын, немересін және қамқоршысын да қосуға болады.
Отбасы құрамына қарай кезекте тұрған азаматқа қандай тұрғын үй берілетіні анықталады. Отбасы неғұрлым үлкен болса, пәтер де соғұрлым үлкен болады.

2. Жалғыз тұрғын үйдегі үлес 50% немесе одан жоғары болмауы керек

Бұрын: тұрғын үйдегі үлестің мөлшеріне қатысты нақты шектеу болмаған.

Не өзгерді: кезекте тұрған азаматтың немесе оның отбасы мүшесінің тұрғын үйдегі үлесі 50% немесе одан жоғары болса, ол тұрғын үй кезегінен шығады.
Үлес 50%-дан аз, мысалы, ⅓ немесе ¼ болса, бұл ереже қолданылмайды.

Маңызды: бұл жаңа талап тұрғын үй кезегінде бұрыннан тұрғандарға қатысты емес.

3. Билік пәтерді аудан емес, бөлме санына қарай үлестіреді

Бұрын: негізінен тұрғын үйдің ауданы ескеріліп, бір адамға шамамен 15–18 шаршы метрден келетін.

Не өзгерді: енді отбасы құрамы мен қажет бөлме саны ескеріледі.
Мысалы, жынысы бірдей екі баласы бар отбасыға екі бөлмелі пәтер ұсынылуы мүмкін. Балалардың жынысы әртүрлі болса, әрқайсысына жеке бөлме болуы үшін үш бөлмелі пәтер ұсынылады.
Яғни үлестіру кезінде тек шаршы метр емес, бөлме саны да ескеріледі.

4. Жетім балалар кезектегі орнын сақтайды

Бұрын: отбасы баланы асырап алу, қамқоршылық немесе қорғаншылықтан бас тартса, бала тұрғын үй кезегіне тұру мәселесін қайта шешетін.

Не өзгерді: отбасы баланы асырап алу, қамқоршылық немесе қорғаншылықтан бас тартса, бала кезекке бастапқы есепке қойылған күнін сақтай отырып қайта тұра алады.
Бұл бұрынғы кезектегі орнын жоғалтпауға мүмкіндік береді.

5. Ауылды жерлерде кезекте тұрғандар жалға берілетін тұрғын үйді өздері таңдай алады

Бұрын: SMS арқылы хабарландыру жүйесі қолданылатын.

Не өзгерді: енді SMS күтудің қажеті жоқ. Ауылды жерлерде тұрғын үй кезегінде тұрған азаматтар жалға берілетін тұрғын үйді өздері таңдап, өтініш жібере алады.

14 қыркүйектен бастап Отбасы банк кезекте тұрған азаматтарды түгендей алады. Ол үшін жеке деректерді өңдеуге келісім берудің қажеті жоқ. Енді банк мәліметтерді жаңартып, тұрғын үйді жылдамырақ үлестіре алады.