Енді кондиционерді фасадтың кез келген жеріне орната алмайсыз. Астана билігі тұрғын үйге кондиционер орнатуға қойылатын талаптар жазылған жаңа дизайн-кодты бекітті.

Жаңа ереже 2026 жылғы 11 қыркүйектен бастап күшіне енеді.

Кондиционерді қайда орнатуға болады

Жаңа талаптарға сәйкес кондиционердің сыртқы блогы:
— аулаға қарайтын қасбетте;
— шатырда;
— жасырын техникалық лоджияда;
— арнайы техникалық орында тұруға тиіс.

Мұның бәрі жобада жазылуы керек.

Кондиционер үйдің алдыңғы қасбетінде болса, жоба бойынша арнайы орын немесе сәнді қорғағыш экран болуы керек.
Кез келген қорғағышты орнатуға болмайды. Оның өлшемі мен сырт келбеті ғимараттың дизайнына сәйкес болуы қажет, ал түсі қабырғаның негізгі немесе қосымша түсімен үйлесуге тиіс.

Алдыңғы қасбеттегі баған, пилястр, руст және ернеу сияқты шығыңқы сәнді элементке кондиционер орнатуға болмайды.

Блок ашық болмауы керек

Кейбір жағдайда дизайн-код кондиционерді ашық орнатуға тыйым салады.
Бұл талап:

  • магистральды көше;
  • алаң,
  • қоғамдық кеңістік және негізгі жаяу жүргінші жолына қарайтын қасбетке қатысты.

Абаттандыру талаптарын бұзған жеке тұлғаға ескерту жасалуы немесе 20 АЕК (86 500 теңге) мөлшерінде айыппұл салынуы мүмкін. Бір жыл ішінде қайталаса, 30 АЕК (129 750 теңге) айыппұл арқалайды. Заңды тұлға үшін айыппұл мөлшері жоғары.

«Қасбетте бұрыннан бері тұрған кондиционер үшін автоматты түрде айыппұл салынбайды. Жаңа талап бұрын орнатылған элементтерге кері күшпен қолданылмайды», — деп түсіндірді Астана урбанистика орталығы директорының орынбасары Данияр Шындалиев.

Конденсат пен сымды қайда жіберу керек

Кондиционерден шығатын суды тротуарға, қасбет элементіне немесе кіреберіске ағызуға болмайды.
Конденсат ғимараттың ішкі кәріз жүйесіне немесе қасбеттің ішіндегі арналар арқылы ағып кетуі керек.

Алдыңғы қасбеттің үстімен кабель, сым және басқа инженерлік желіні ашық жүргізуге болмайды. Олар қабырғаның ішінде, арнайы арна немесе панельдің артында жасырылуы қажет.

Бұрын орнатылған кондиционердің орнын ауыстыру керек пе

Кондиционер бұрын орнатылған болса, оны алып тастау немесе басқа жерге ауыстыру қажет емес. Жаңа талап жабдықты екінші рет орнатқанда немесе қасбетті жөндегенде ескеріледі.

фото, цитата: «Барлық үйді жаңа талаптарға бірден келтірмейміз. Үйді жөндегенде және жаңартқанда қасбет кезең-кезеңмен ауысады», — деді Krisha.kz-тің ресми сауалына жауап берген Астана урбанистика орталығы директорының орынбасары Данияр Шындалиев.

Кондиционер қайта орнатылса, ескі кондиционер ауысса немесе үйдің қасбеті жөнделсе, оны енді дизайн-код талаптарына сәйкес орнату қажет, — деп түсіндірді Данияр Шындалиев.

Дизайн-код 2026 жылғы 11 қыркүйекте күшіне енді. Қолданыстағы объектілер үшін өтпелі кезең қарастырылған, оларға қатысты талаптар 2027 жылғы 1 қаңтардан бастап қолданылады.