Алматы билігі тұрғындарды тіркеуге шектеу енгізді. Енді тіркеу кезінде тұрғын үйдің ауданы ескеріледі: бір адамға кемінде жалпы тұрғын үй ауданының 15 шаршы метрі тиесілі болуы керек.

Жаңа ереже тұрғылықты жері бойынша және уақытша тұратын жері бойынша тіркеуге, яғни тұрақты және уақытша тіркеуге қатысты.

Бұл қалай жұмыс істейді

Пәтердің ауданы 30 шаршы метр болса, жалпы ереже бойынша онда екі адамды (әр адамға 15 шаршы метрден) тіркеуге болады.

Пәтердің ауданы тағы бір адамды қосатындай болмаса, тіркеу мүмкін емес.

Мысалы, ауданы 30 шаршы метр пәтерде екі адам тіркелген болса, үшінші бөгде адамды тіркей алмайсыз.
Алайда бұл ереже барлығына бірдей қолданылмайды.

Туыстарды тіркеуге болады

Бір адамға 15 шаршы метр нормативі тұрғын үй иесінің отбасы мүшелері мен жақын туыстарына қолданылмайды.
Мысалы, ауданы 30 шаршы метр пәтер ерлі-зайыптының біріне тиесілі болса, ол:

  • жұбайын,
  • балаларын және олардың отбасы мүшелерін,
  • жақын туыстарын,
  • асырауындағы, қамқорлығындағы немесе қорғаншылығындағы адамдарды тіркей алады.

Яғни ауданы 30 шаршы метр бір бөлмелі пәтерде төрт адамнан тұратын отбасы (тұрғын үй иесі мен оның жақын туыстары болса) тіркеле алады. Бұл жағдайда әр адамға 15 шаршы метр деген талап қолданылмайды.

Үкімет не үшін шектеу енгізді

Біріншіден, билік «резеңке пәтерлермен» күресуді көздеп отыр. Жаңа тәртіп бір мекенжай бойынша тіркелген, бірақ іс жүзінде ол жерде тұрмайтын көп адамды азайтуға бағытталған.

Мәслихаттың пікірінше бұл халық санының есебін нақты жүргізуге және мектептерге, емханаларға, коммуналдық желілерге және басқа инфрақұрылым нысандарына түсетін жүктемені дәлірек жоспарлауға көмектеседі.