Қазақстанда 7-9 % мөлшерлемемен жаңа «Наурыз» ипотекасы іске қосылды. Өтінім 25 сәуір мен 30 маусым аралығында қабылданады, оны жұмыс күндері сағат 9:00 бен 21:00 аралығында жіберуге болады.

«Наурыз» ипотекасына өтінім қалай жібереміз

  • Оtbasybank.kz сайтындағы Baspana Market бөліміне өтіңіз. Тіркеліңіз.
  • «Менің өтінімдерім» бөлімінде «Наурыз» бағдарламасы түймесін тауып, «Өтінім жіберу» түймесін басыңыз.
  • Бағдарламаның шарттарын оқып шығыңыз, тұрғын үй сатып алатын аймақты, сондай-ақ өтініш берген кезде тұрып жатқан аймақты таңдаңыз. Шарттарды оқып шықтым деп белгі қойып, «Жалғастыру» түймесін басыңыз.
  • Депозитті таңдап, шарттармен келісіп, «Жалғастыру» түймесін басыңыз.
  • Ұялы телефон нөміріңізге SMS келеді, оны растау қажет.
  • Растаудан кейін өзіңіз туралы мәліметті қарап шығыңыз, белгіні қойып, «Жалғастыру» түймесін басыңыз.
  • Әрі қарай мемлекеттік деректер базасынан сізде және жұбайыңызда баспананың бар-жоғы тексеріледі.
  • Содан кейін банк мүлікті тексереді. Бұл үш жұмыс күнін құрауы мүмкін. Естеріңізге сала кетейік, банк қызметкерлері баспана түрін қолмен тексереді: тұрғын үй, тұрғын үй емес . Бұрын қойма немесе паркинг болса қатысу мүмкін емес еді. Енді қатысуға болады.
  • Тексеру сәтті өткеннен кейін «Растау» түймесін басыңыз. Жылжымайтын мүліктің болмауы туралы хабарлама келеді. «Жалғастыру» түймесін басыңыз.
  • Барлық шартпен танысып, электрондық цифрлық қолтаңбамен өтінімге қол қойыңыз. «Жалғастыру» түймесін басыңыз. Өтініш жіберілді.

«Наурыз» бағдарламасының шарттары 

  • Бастапқы жарна — 20 %-дан бастап.
  • Тұрғын үй алуға кезекте тұрған әлеуметтік осал топтар үшін мөлшерлеме — 7 % (ЖТСМ — 7.3 — 8.9 %).
  • Қалғандарына — 9 % (ЖТСМ — 9.3 — 11.8 %).
  • Несие мерзімі — 19 жыл. 

«Наурыз» ипотекасы: 7 %-бен кім несие ала алады 

Несиенің ең жоғары сомасы 

— Алматы мен Астана үшін — 36 млн теңгеге дейін;
— қалған аймақтар үшін — 30 млн теңгеге дейін.
Несиеге үй жөндеуге кететін ақшаны қосуға болады, бірақ несие сомасының 20 %-нан аспауы керек. 

Кім қатыса алады 

— тұрғын үй алуға кезекте тұрған әлеуметтік осал топтар;
— жұмыс істейтін жастар;
— жас отбасы;
— тұрғын үй төлемін алып отырғандар;
— Отбасы банк салымшылары;
— моноқала, аудан орталықтары және ауыл тұрғындары. 

Қатысушыларға қойылатын талаптар 

  • Отбасы банктен депозит ашу керек. Депозит мерзімі маңызды емес.
  • Депозитте кем дегенде 1 миллион теңге болуы керек. Бұл соманы қатысуға өтінім берер алдында салуға болады.
  • Өтініш берушінің де, оның отбасы мүшелерінің де (жұбайының, кәмелетке толмаған балаларының) соңғы бес жылда баспанасы болмауы керек. Некеге тұрмаған болса, оның атында үйдің бар-жоғы ғана тексеріледі. Кәмелетке толған балалардың ата-анасын тексермейді.
  • Соңғы алты айдағы ресми табысы болуы керек. 

Табысқа жалақы, кәсіпкерліктен түскен пайда, ақылы қызмет көрсету келісімшарты бойынша табыстар, стипендия, тұрғын үй төлемдері кіреді. Табысыңыз жеткіліксіз болса, екі тең қарыз алушыны қоса аласыз.

Қандай баспана алуға болады 

— Алматы, Астана, Шымкент және облыс орталықтарындағы бірінші нарықтан, оның ішінде ҚТК кепілдігімен үлестік қатысу келісімшарты бойынша, яғни салынып жатқан тұрғын үй кешендерінен.
— Моноқалалар мен ауылдардан екінші нарықтағы тұрғын үйлерді.

Бірінші нарықтағы тұрғын үйді «Отбасы Банк» сайтында «Баспана маркет» бөлімінде өтініш беру және саралау кезеңінен кейін ғана таңдауға болады.

Бағдарлама сегіз жылға созылады. Биыл 300 миллиард теңге бөлініп, оған 12 мың адам ипотека ала алады. Мемлекет алдағы жылдары 200 млрд теңге бөлуді жоспарлап отыр және осы мерзім ішінде 68 мың адамды баспанамен қамтамасыз етпекші.