Қазақстанда «9-20-19» атауымен танымал жаңа «Отау» ипотекасына қатысу бойынша өтінім қабылдау басталады. 

Өтінім тек онлайн, «Баспана маркет» (otbasybank.kz) порталында қабылданады. Міндетті түрде ЭЦҚ кілт болу керек.
Өтінім сәуірдің аяғына дейін екі ай қабылданады. Мамырдың ортасына дейін ұпайлар есептеледі. Келесі кезең — төлем қабілетін бағалау. Кейін баспана іздей беруге болады, оған 6 ай беріледі.

Отбасы банк ұсынған «Отау» ипотекасы: сұрақтарға жауап береміз

«Отау» ипотекасының шарттары

  • Мөлшерлемесі 9 %.
  • Бастапқы жарна 20 %.
  • Несие мерзімі 19 жыл.
  • ҚР азаматтары мен қандастар қатыса алады.
  • Қатысушы жасы — 18-63 жас.
  • Бес жыл ішінде баспана болмау керек
  • Отбасы банктен депозит ашқанына 18 айдан асқан, шотында 1 млн теңгесі болу керек.
  • Ипотеканың ең жоғары сомасы (үйді жөндеуді қосқанда): 
    — 30 млн — Астана, Алматы; 
    — 18 млн — қалған аймақтарда.
  • Астана, Алматы, Шымкент және облыс орталығы саналатын 17 қаладан жаңа үй алуға ғана рұқсат беріледі. Қалған аймақтарда кез келген үйді алуға болады.
  • Астанада немесе Алматыда пәтер сатып алғанда тұрақты тіркеу қажет, үш және одан көп мерзімде болғаны абзал.

Несие сомасына жаңа тұрғын үйді жөндеуге кететін сома кіреді, шамамен 30% (18-30 млн).

Отбасы банк ұсынған «Отау» ипотекасы: есеп мысалдары және ерекшеліктері

«Отау» ипотекасына қатысу үшін өтінім қалай беріледі

1. otbasybank.kz сайтына өтіп, кіріңіз:
— «Кіру» түймесін басыңыз. Өтініш беруші клиент ретінде кіру керек. Тек салымшы қатыса алады немесе
— баннер арқылы (үйдің суреттерімен) кіріңіз. Өтініш беруші кіру бетіне өтіп, клиент ретінде кіреді.

2. Өтінім жіберіңіз.
Тіркелгеннен кейін жеке кабинет ашылғанда «Өтінім қалдыру» түймесін басыңыз.

3. «Отау» бағдарламасының шарттарымен танысыңыз.

4. Қазір өзіңіз тұрып жатқан өңірді таңдаңыз.
5. Сатып алынатын үй тұрған өңірді таңдаңыз.
6. Өңірді таңдағаннан кейін бағдарламаның шарттарымен таныстым, келісемін деп, «Жалғастыру» түймесін басыңыз.

Келесі кезеңге депозитте кем дегенде 1 млн теңге жинаған адам өтеді.

7. Қажет депозитті таңдаңыз.
Қолжетіміді депозиттер түспен ерекшеленіп тұрады.

Қатысушы бағдарламаның шарттарымен келіспеген жағдайда, жоғары оң жақ бұрыштағы «Жою» түймесін басу арқылы бағдарламаға қатысудан бас тарта алады.

8. «Таңдау» түймесін басып, таңдаған депозитті растаңыз.
Таңдалған депозиттің саны мен жалпы сомасы көрсетілген терезе ашылады.
«Өңдеу» түймесі қолжетімді болады, оның көмегімен таңдалған депозиттерді өзгертуге болады.

9. Мыналарға келісім беріңіз:
— өтінім туралы мәліметті банктің сайтында жариялауға;
— үшінші тұлғалардың жеке деректерді жинауға, өңдеуге және сақтауға.
Бағдарламаға қатысуды жалғастыру үшін «Жалғастыру» түймесін басыңыз.

Депозит бағдарлама шарттарына сай келмесе, өтінімді толтырып, қайта тапсыру керек.

10. Мемлекеттік деректер қорындағы жеке ақпаратты өңдеуге келісетініңіз туралы СМС алу үшін телефоныңыздың нөмірін растаңыз.

11. СМС-ке:
— ИӘ/ДА/511 — жеке ақпаратты жинауға, өңдеуге және бағдарламаға қатысуға келісесіз;
— ЖОҚ/НЕТ/512 — жеке ақпаратты беруден және бағдарламаға қатысудан бас тартасыз.

СМС келмеген жағдайда 5 минуттан кейін қайта жіберуді сұрауға болады.

12. СМC арқылы оң жауап алғаннан кейін бағдарламаға қатысу үшін сайттағы «Растадым» түймесін басыңыз.

Қатысушының нөмірі Мобильді азаматтар базасындағы нөмірге сәйкес келмесе, оны электрондық үкімет порталы немесе eGov мобильді қосымшасы арқылы өзгертуге болады.

Отбасы Банк қатысушы туралы ақпарат алу үшін eGov-қа сұраныс жібереді. Бұған он минут кетуі мүмкін.

Содан соң экранға ақпарат шығады, оның өзектілігін тексеру керек.
Сәйкес келмесе, eGov.kz сайтына өтіп жаңарту керек.

Бұл кезеңде пәтері, үйі, кез келген үлесі, жер телімі, жатақханадағы бөлмесі барлар өтпей қалады.

13. Бағдарлама бетінен шығу үшін «Аяқтау» түймесін басыңыз.

14. Отбасы жағдайын белгілеңіз.
Қатысушы үйленбеген болса, деректердің сәйкестігін тексеріңіз. Бәрі дұрыс болса, белгі қойып, «Жалғастыру» түймесін басыңыз.
Үйленген болса, жұбайы мен балалары туралы деректер тексеріледі. Дұрыс болса, белгі қойып, «Жалғастыру» түймесін басыңыз.

Қатысушының жұбайына СМС келеді, оған «Иә» немесе «Жоқ» деп жауап беру керек.

15. Жұбайыңыз СМС-ке жауап бергеннен кейін сайтта «Жұбайым растады» түймесін басыңыз.

Банк ақпарат алу үшін eGov-қа сұраныс жібереді. Жұбайында жылжымайтын мүлік болса, клиент бағдарламаға қатыса алмайды.

16. «Отау» бағдарламасына қатысуға өтінімді оқып, ақпаратты «Отбасы Банктің» сайтында жариялауға келісім беріңіз. Белгі қойып, «Қол қою» түймесін басыңыз.
Құжаттарды жүктеп алуға болады.

17. Өтінім берілген болып саналады. Оны «Отбасы Банк» порталында, жеке кабинеттегі «Менің өтінімдерім» бөлімінен көруге болады.

Өтінім қабылдау — 1 наурыз бен 30 сәуір арасы.
1-15 мамырда ұпайлар есептеледі.
Келесі кезең — төлем қабілетін бағалау және баспана іздеу. Баспана іздеуге 6 ай беріледі.

Не үшін ұпай беріледі

  • «Отбасы Банктегі» депозиттің әр жылы үшін 5 балл беріледі. Қатысу үшін бірнеше депозит таңдалса, мерзімі ең бірінші ашылғаны бойынша есептеледі.
  • Депозит бойынша банк сыйақысының мөлшері жиналған сомаға қарай жылына 2% құрайды, әр 1000 теңге үшін 5 балл беріледі. Қатысу үшін бірнеше депозит таңдалса, сыйақы сомасы барлық депозит бойынша қосылады.
  • Отбасы жағдайы — неке тіркелген болса 10 балл.
  • Баласы болса (18 жасқа дейін) санына қарамастан 50 балл.

Ұпай есептеу көрсеткіштері өтінім қабылдаудың соңғы күніне қарай қабылданады.

Ұпай есептелгеннен кейін конкурстан өткендердің тізімі «Отбасы банк» порталында жарияланады.

Жақында «Отау» бағдарламасының шарттарын коммерциялық банк, 7-20-25, 50/50 ипотекаларымен салыстырдық. Толығырақ мына жерден оқи аласыз: Қай ипотека арзан