Қазақстанда ипотеканың ең жоғары мөлшерлемесін есептеу ережесі өзгерді.
Енді мөлшерлеме бастапқы жарнаның көлеміне тәуелді: сатып алушы неғұрлым көп ақша салса, мөлшерлеме соғұрлым төмен болады.

Қаулыны Ұлттық банк пен Қаржы нарығын реттеу және дамыту агенттігі қабылдады.

Жылдық тиімді сыйақы мөлшерлемесі (ЖТСМ) — пайыздық мөлшерлемені және барлық міндетті төлемді есептегендегі қарыздың толық құны. Ол әр қарыз үшін жеке есептеледі және бір жыл ішінде несие қанша болатынын көрсетеді. ЖТСМ жоғары болса, ай сайынғы төлем мен артық төлем көп болады және керісінше.

Схема қалай жұмыс істейді

Жаңа ереже 2027 жылғы 1 қаңтардан бастап күшіне енеді.

Сатып алушы пәтер құнының 30%-ын төлеп, қалған 70%-ы үшін несие рәсімдесе, ЖТСМ-нің ең жоғары шегі — 20%.

Бастапқы жарна 30%-дан аз болып, несие сомасы тұрғын үй құнының 70%-ынан асса, ЖТСМ-нің шекті мөлшері бұрынғыдай 25% деңгейінде қалады.

Есептеу кезінде банк тұрғын үйдің құнын екі көрсеткіштің ең төменіне қарап анықтайды: сатып алу-сату келісімшартындағы баға немесе тәуелсіз бағалаушы бағалаған нарықтағы құны.

2027 жылғы 1 қаңтарға дейін қазіргі ең жоғары ЖТСМ — 25% қалады.

Реттеушілер бастапқы жарнасы жоғары ипотеканы алға тартып отыр. Мұндай несиенің қаупі төмен, сондықтан ЖТСМ-нің шекті деңгейі төмен.

Басқа несиелер өзгермеді

Өзге қарыз түрі бойынша ең жоғары мөлшерлеме өзгермеді:

кепілсіз несие — 46%;
кепілмен берілетін несие — 35%;
микронесие — жылдық мөлшерлемесі 179%-ға дейін.

Пайдалы материалдар:
Қазақстанда табысты растамай ипотека алуға бола ма
Билік 2035 жылға дейін Алматыдағы үйлердің сейсмотұрақтылығын арттырады
Кондиционер орнатқаныңыз үшін айыппұл арқалайсыз ба

Қазақстанның жылжымайтын мүлік нарығындағы жаңалықтар